Дунёдаги энг машҳур поп юлдузи Майкл Жексон ўлимидан бир йил утиб унинг акаси, Жермайн Жексон Би-би-си Жаҳон Хизмати билан суҳбатда қандай қилиб Ислом дини укаси Майкл ҳаётини сақлаб қолиши мумкинлиги ҳақида гапирди.

Би-би-си аввалига "Тангри Шоҳидлари" диний оқимида бўлган оилада туғилиб ўсган, Жермайннинг нима учун 1989 йилда Исломга кирганини сўради

Жермайн Жексон: Чунки мен ўз бошимда ғужғон ўйнаган ва ҳаётимда мени ўйлантирган кўплаб саволларга жавоб излаганман. Мен ўзим излаган мукаммалликни Ислом динида топдим. Биламан, экстремистлар туфайли ҳозир Исломга ола қарашади. Лекин мана Америкага қаранг, бу ерда энг ёмон ишларни қилган одамлар масиҳийларку. Лекин ҳеч ким уларни Христиан террорчилари деб атамайди. Шу учун мусулмонларга нисбатан ҳам бу каби номларни тақамаслигимиз керак. Шуни билишимиз керакки, экстремизм ҳамма динларда бор ва барчамиз ягона Аллоҳга ибодат қиламиз. Шундай қилсак, ҳаммаси яхши бўлади.

Би-би-си: Оилангиз қандай қабул қилган сизнинг мусулмон бўлишингизни?

Жермайн Жексон: Бошида онам ҳайрон бўлди. Лекин кейин қарашса, мен яхши ўғил, яхши эр, яхши ота, яхши дўст ва жиянларим учун яхши амакига айландим. Яхши мусулмон ҳамма нарсадан Аллоҳни авло кўради. Ислом йўлига кирганимдан жуда фахрланаман. Мен доимо ўзимни Майклнинг ҳам муҳофазакори деб билганман.

Би-би-си: Нега бундай деяпсиз?

Жермайн Жексон: Агар Майкл Ислом динига юзланганида эди, у ҳозир биз билан бирга бўларди. Бундай дейишимга сабаблар бир талай. Нега дейсизми? Агар кимлигингиз, аслингиз нима эканлиги борасида 100 % ишончингиз комил бўлса, атрофингиздаги одамлар кимлиги борасида фикрингиз аниқ бўлса, унда ҳамма нарса сизга яхшилик келтиради. Куч беради. Аллоҳ - барча нарсага Қодир Зот. Майкл ўрганаётган эди. Кўплаб китобларни ўқиётганди. Мен унга Саудия Арабистонидан, Баҳрайндан китоблар олиб келгандим. Аслида мен уни Баҳрайнга жўнатганман. Мен инимнинг Америкадан чиқиб кетишини истаганман.

Би-би-си: Лекин Майкл Жексон Исломни қабул қилишни истамаган, шундайми?

Жермайн Жексон: Йўқ, Майкл Исломни истамади эмас. Майклни қўриқлайдиган инсонларнинг барчаси мусулмонлар эди. Чунки у Ислом динига ишона бошлаганди. Бу одамлар Майклнинг ҳаёти учун ўзларини қурбон қилишга тайёр эдилар. Улар Майкл учун эмас, балки Аллоҳ йўлида энг эзгу инсонийлик амалларини бажаришга шай эдилар. Ёнингда шундай одамлар бўлгач, албатта, Аллоҳнинг паноҳида эканингни ҳис қиласан. Майкл дунёнинг турли бурчакларида кечқурун оч-наҳор уйқуга кетадиган болалар ҳақида қайғурарди. Улар ҳақида кўп гапирарди. Нафсимиз ортидан ер сайёрасида қилаётган ишларимиздан ҳам ташвишда эди. Бу борада у огоҳликка чақирарди. Майкл бу ишларни ҳали Ал Горлардан, дунё иқлими исияпти деб аюҳаннос солаётган одамлардан анча олдин бошлаган эди. Унинг чиндан юраги ачирди. Бу борада у ашула айтган, видеоклиплар ишлаганди. Заминни қай аҳволга олиб келиб қўяётганимизни 3 дақиқалик видеоклипда кўрсатиш учун миллион- миллион доллар сарфлаганди.

Би-би-си: Майкл жексоннинг болаларга тегажоғлик қилган деган айбловларга ишонасизми?

Жермайн Жексон: Сиз-чи, ўзингиз ишонасизми?

Би-би-си: Бу айблар маҳкамада рад қилинди.

Жермайн Жексон: Унга қўйилган барча айбловлар олиб ташланди. Болакай, Жордан Чандлернинг ўзи келиб, Майкл унга ҳеч қачон қўл текизмаганини айтди. Унинг отаси ўз жонига қасд қилади. Матбуот эса укам қилмаган ишни кўтариб чиқиб, уни дунёга шарманда қилишга тушади. Кўплаб одамлар ҳали-ҳанўз бу гап-сўзларга ишонмайди. Инсонлар кўрсатаётган меҳр-муҳаббатни унинг тириклигида кўрсатиш лозим эди. Федерал қидирув бюроси укамни 17 йил текширди ва ҳеч нарса топа олмади. Ўлимидан кейин эса уни ёмонотлиқ қилишга ўтдилар. Бу ҳаммаси бўлмағур гап.

Би-би-си: Майклнинг ўлимидан бери ҳаёт қандай кечмоқда?

Жермайн Жексон: Жуда оғир кечаяпти. Юрагимдаги ҳисларимни тасвирлашга сўз ожиз. Буни фақат бошига тушган инсон билади. Бошимизда бор экан, ундан қочиб қутулиб бўлмаслигини тушунаяпмиз. Аммо юрагимиздаги тош доимо қолади ва у жуда ҳам оғир бир юк.

Би-би-си: Укангизни соғинасиз албатта?

Жермайн Жексон: Мен уни жуда жуда соғинаман. Чунки аввал бошиданоқ ўртамиздаги ришталар кучли эди. Болаликдан токи улғайибмизки, бирга эдик. Хотирамга келадигани бирга қилган гастролларимиз, мусиқалар... Ундан ҳам олдинги болалик хотиралари - уйимиз, бошланғич мактабга борганимиз, ҳаммаси, ажойиб эди. Ашула айтиб, унинг номидан мукофотларни қабул қилиб олиб, хотирасига ҳурмат бажо келтириб, қандайдир овунгандек бўламиз. Фақат яхши хотираларин эслаш керак, у қилган яхши амалларни ёдга олиш керак. Унинг мусиқаси ва қўшиқлари, дунёни бирлаштиришга ишончи ҳамон инсонни руҳлантиради. У ўз қўшиқлари ва эътиқодида ана шундай муждани тарқатганди. Бу уйғонишга чорлови эди.

Би-би-си: Майкл жексон олкамдан ўтган куни сиз Лос Анжелесда матбуот вакилларига гапириб турдингиз. Кўплар сизни бу хонадоннинг устуни деб аташди. Ўзингиз ҳам шундай деб ўйлайсизми?

Жермайн Жексон: Мен бундай қарамайман. Мен бир қадам олға ташладим ва вазиятни ўз қўлимга олдим. Мен ўз хонадоним ҳақида ёлғон-яшиқ гапларни эшитишни хушламайман. Бу бироз ғашимга тегади ва нимадир деб гапиргим келади шунда. Яъни дунёга қарата: "Йўқ, биз бундай эмасмиз, биз аслида мана бундаймиз," деб ҳақиқатни билдиришни истайман. Матубот чапга қараб оғиб кетаверса, мен уларни ҳақиқат йўлига ўтишларига интиламан.

Би-би-си: Майкл оламдан ўтгани биланоқ сиз маййитни бориб кўриш борасида эҳтиросли гапиргансиз. Ўшанда эсимда, Майклни шунча нарсага гирифтор қилишгани борасида ўйладим, деб айтгандингиз. Нимани назарда тутгандингиз ўшанда?

Жермайн Жексон: Матбуот, оммавий ахборот воситалари, фитналарни.. Ҳаётда бирон муваффақиятга эришсанг, доим сенинг ҳаётингга кириб келишга интиладиган одамлар бўлади. Менимча, Ҳолливуд юзининг бир четига учуқ тошган соҳибжамол аёлга ўхшайди. Ундан бўса олсангиз, учуғи сизга ҳам ўтади. Ҳолливуд ана шунақа. Улар юзингизга қараб кулиб туришади-ю, лекин ичида бошқа нарсани ўйлашади. Елкангизга қоққан ҳар ким ҳам дўстингиз эмас. Майкл ўлганидан кейингина улар укамни тушуна бошлашди. Тириклигида эса тушунмагандилар.

Би-би-си: Мана энди ўзингизни Майклнинг меросини асраётган киши сифатида биласизми?

Жермайн Жексон: Бу нафақат менинг, балки бутун оиламизнинг масъулияти. Ҳаммамиз - Жаки, Ребби, Тито, Марлон, Ренди, Ла Тоя, мен - барчамиз бу учун масъулмиз. Биз нафақат Майклнинг меросини тирик асрашимиз, балки бутун Жексонлар оиласини муҳофаза этишимиз лозим. Чунки энг аввало биз бир бутунмиз, бир оиламиз. Мусиқа ваё омад деганлари оиладан кейин келадиган иккинчи даражалари нарсалар. Аввало бир оиламиз. Ҳар қанақа ҳолатда бир оила бўлиб қолаверамиз.

Би-би-си: Мана ўзингиз еттита болага ота бўлдингиз. Афтидан кўп болали бўлиш, бу Жексонлар хонадонидаги бир анъана шекилли?

Жермайн Жексон: Ҳозир еттита фарзандим бор. Яна иккита қизчалик бўлишни кутаяпман. Чунки олтита ўғлим бор, қизим эса биттагина. Агар яна иккита қизчам бўлса, худди отамдек уч қиз ва олти ўғилнинг отаси бўламан.

Би-би-си: Қизларингиз учун исм танладингизми?

Жермайн Жексон: Макка ва Мадина.

Би-би-си: Бу сафар Жейдан бошланмаскан-да исмлари. Олти фарзандингиз исми Жейдан бошланарди. Жермейн Жуниор, Жермажести дегандек...

Жермайн Жексон: Ҳа. У тўўқизга тўлди. Қолганлари Жермейн Жуниор, Жереми, Жоурдин, Жейми, Жаъфар ва Жермажести. Ёлғиз қизимга эса Отим деб исм берганман.

Би-би-си: Жермажести, Жер жанобий олийлари дегандек бир исмни қаердан топгансиз. Ғалати эшитилади, тўғрими?

Жермайн Жексон: Унга нима деб от қўйишни билмай қолганман ва қаёқдандир шу исм миямга келган. Жерма деган қисми ўз исмимдан олинган. Кейин "-жести"ни қўшиб, Жермажести деб атадим. Мен бу исмга бунча эътибор қаратилишини ўйламаган эканман, лекин бирданига матбуот бунга ёпишиб олди. Тўғри бу ўйлаб топилган бир исм. Мен унга "Жерм" дегандек лақаб қўйишларини истамайман. Шу учун уни Жермажести деб чақираман. Унинг оти Жермажести.