Руминия билан ўйин ўтказилмаганига яраша, Ўзбекистон олимпия терма жамоасининг Украинада ўтказилган Валерий Лобановский хотира турниридан ғолиб чиқишига гувоҳ бўлдик. Қувончли лаҳзалар. Ушбу ғолиблик яна шуниси билан эътиборга молик: эртага юртимизда 1979 йилда авиафалокатга учраган "Пахтакор"нинг 17 ўғлони эсга олинади; бу ўғлонларимиз айнан Украина осмонида самога сочилиб кетишганди. Олимпиячиларимиз ўша юлдузларимизга муносиб издош бўлиб, Украинадан Кубок билан қайтадиган бўлишди.
"Спорт" телеканалига раҳмат - ўйинни тўлиқ томоша қилдик. Абрамов шогирдларига раҳмат - улар кеча Сербияни ютиб, финалга чиқишди ва бизга финал ўйинини кўриш учун имконият яратишди.
Украиналиклар мезбон сифатида ўйин бошидан олдинги интилишларини табиий ҳол сифатида қабул қилиш лозим. Йигитларимиз эса Яровенко шогирдларининг ҳамлаларини бартараф эта олишди ва аста-секин тўпни ўз изнларига бўйсундиришга интилишди. Гарчанд бу тактика терма жамоамизга ўйин бошида наф келтирмаган бўлса-да, рақибнинг шаштини синдиришда фойда берди.
Шундан сўнг, мезбонлар кўпроқ қарши ҳужумда тўп суришга мажбур бўлишди. Ўйиннинг 26-дақиқасида Ислом Тўхтахўжаев оддий вазиятда ўта қўпол вазиятга йўл қўйди - ён қанотдан тўп майдонни тарк этаётгандек ва уни Ислом назорат қилаётгандек кўринган бир вазиятда рақиб футболчиси бирданига тўпга ташланди; унинг тўпга ташланишини кўрган Тўхтахўжаев тўпни тепиб юбормоқчи бўлди. Аммо тўп Павловга текканича, ҳужум уюштириш учун қулай вазиятга юзага келди. Тўпни эгаллаган футболчи уни Евгений Шаховга узатди. Аммо Шахов тўпни тўхтатишда қўпол хатога йўл қўйди ва тўп билан бирга қулай вазиятни ҳам қўлдан чиқарди. Орадан 3 дақиқа ўтиб, бу сафар Павловнинг ўзи Мочалов билан бирга-бир вазиятга чиқиб борди. Тўпни дарвозабонимизнинг ёнидан ўтказиб, ўзи уни айланиб ўтишга ҳаракат қилди. Аммо тўпни қаттиқроқ тепиб юборгани учун тўп майдон ташқарисига чиқиб кетди.
Терма жамоамиз тўпни назорат қилишга ва комбинацион футбол намойиш қилишга ҳаракат қилган бўлса-да, рақиб дарвозаси томон илк хавфли зарба узоқ масофадан йўлланди. Шерзод Каримов бурчак тўпини жарима майдончасига кириб келаётган Жавлон Иброҳимовга ерлатиб узатди. "Бунёдкор" ярим ҳимоячиси ўз навбатида уни орқароққа қолдирди. Салим Мустафоевнинг кучли зарбасини Максим Коваль қийинчилик билан қайтариб қолди. Айнан ушбу вазиятдан сўнг, ё йигитларимизда ўзларига бўлган ишонч ортиб кетди, ёки украиналиклар бироз қўрқиб қолишди шекилли, ташаббус ва хавфли вазиятларни содир этиш бўйича устунлик Абрамов шогирдлари томонга ўтиб кетди. 43-дақиқада уюштирилган ажойиб ҳужум натижасида Олег Зотеев жамоадоши билан "девор" услубида ўйнаб, жарима майдончасига ёриб кирганча, тўпни Коваль қўриқлаётган дарвозанинг яқин бурчагига йўллади. Дарвозабон уни майдон ташқарисига чиқариб юборди.
Иккинчи бўлим бошида худди аввалгисида бўлгани каби мезбонлар ташаббусни қўлга киритишга ҳаракат қилишди. Бурчакдан узатиб берилган тўпга чиқишда Мочалов хатога йўл қўйди. Федотов эса ўткир бурчак остида тўпни эгаллаб олиб, уни шерикларига узатиш ўрнига ўзи дарвоза томон зарба берди. Тўп ҳимоячимизга тегиб, майдон ташқарисига чиқариб юборди.
Ўша сценарий бўйича ўйин давом этди. Рақибнинг бўлим бошидаги босимини бартараф этган футболчиларимиз 69-дақиқада ажойиб ҳужум уюштиришди. Ҳужумга қўшилишни яхши кўрадиган ўнг қанот ҳимоячиси Абдуқаҳҳор Ҳожиакбаровнинг очилишини Зоҳир Пиримов ўз вақтида кўра олди. "Олмалиқ" ҳимоячиси ўткир бурчак остида на дарвоза томон тўғри зарба берди ва на шерикларига тўпни узатди (бу вазиятда тўпни қабул қиладиган шерикларнинг ўзи йўқ эди). Орадан 4 дақиқа ўтиб яна ўша Ҳожиакбаров яна ҳужумга қўшилди, аммо тўпни қабул қилишда техник хатога йўл қўйди.
Иккинчи бўлимнинг қолган дақиқаларида ташаббус тўлалигача Ўзбекистон терма жамоасида бўлгани қувонарли ҳолат. Украиналиклар эса фақат ўйиннинг сўнгги 10 дақиқасида ҳаракатга тушиб қолишди. Ана ташаббус натижаси ўлароқ Александр Бобыль ўйин тугашига 2 дақиқа қолганида ўнг қанотдан олдинга интилди ва бутун учрашув давомида фаол ўйин кўрсатган Акбар Исматуллаевни алдаб ўтиб, дарвозабонимиз билан бирга-бир вазиятда зарба берди. Тўп Мочаловнинг ёнидан ўтиб кетганида ўзбек футбол мухлислари юраклари бир ҳапқириб тушган бўлса не ажаб. Бахтимиз тўп дарвоза устунининг шундоққина ёнидан ўтиб кетди.
Ўйин тугади. Мусобақа регламентига кўра, ғолибни аниқлаш учун қўшимча бўлимлар белгиланмади. Навбат дарҳол пенальтилар сериясига берилди. Бу пенальтилар серия барча-барчанинг асабларини синовдан ўтказди. Ҳар иккала жамоа нақ 8 мартадан дарвоза томон зарба беришди. Футболчиларимиз зарба беришда бирор марта ҳам адашишмади. Украинанинг саккизинчи футболчиси - ўша сўнгги дақиқада гол ура олмаган Александр Бабырнинг зарбасини Виктор Мочалов бартараф этишга муваффақ бўлди. Шу тариқа Ўзбекистон олимпия терма жамоаси Валерий Лобановский хотирасига бағишлаб ўтказилган мусобақанинг ғолибига айланди.
Ўйиндан кейин терма жамоамизга мусобақа кубоги топширилди. Бундан ташқари, Ислом Тўхтахўжаев (мусобақанинг энг яхши ҳимоячиси) ва Шерзод Каримов (мусобақанинг энг яхши ярим ҳимоячи)га шахсий совринлар топширилди.
Лобановский хотира турнири
ФИНАЛ. 10 август
ЎЗБЕКИСТОН - УКРАИНА - 0:0. Пенальтилар бўйича: 8:7
Пенальтилар серияси:
Ислом Тўхтахўжаев (1:0) - Денис Гармаш (1:1)
Акбар Исматуллаев (2:1) - Евгений Ткачук (2:2)
Фозил Мусаев (3:2) - Сергей Кривцов (3:3)
Кенжа Тўраев (4:3) - Дмитрий Еременко (4:4)
Виктор Мочалов (5:4) - Роман Безус (5:5)
Зоҳир Пиримов (6:5) - Дмитрий Гречишкин (6:6)
Салим Мустафоев (7:6) - Юрий Путраш (7:7)
Абдуқаҳҳор Ҳожиакбаров (8:7) - Александр Бабырь (8:7, дарвозабон)
Огоҳлантиришлар: Виталий Федотов 21, Дмитрий Еременко 90
Ўзбекистон: Виктор Мочалов, Акбар Исматуллаев, Абдуқаҳҳор Ҳожиакбаров, Салим Мустафоев, Шерзод Каримов (Нодиржон Одилов 74), Олег Зотеев (Владимир Козак 46), Жасур Ҳасанов, Жавлон Иброҳимов, Дилшод Раҳмутуллаев (Фозил Мусаев 46), Жасур Ҳасанов (Зоҳир Пиримов 46), Темурхўжа Абдухолиқов (Кенжа Тўраев 62),
Украина: Максим Коваль, Сергей Кривцов, Евгений Опанасенко, Дмитрий Хомченовский (Денис Гармаш 46), Кирилл Петров (Алексей Бобырь 46), Евгений Павлов (Юрий Путраш 46), Андрей Ткачук, Евгений Шахов (Виталий Виценец 46), Виталий Федотов (Дмитрий Еременко 58), Андрей Богданов (Ромен Безус 58), Дмитрий Гречишкин.
3-ЎРИН УЧУН
ИСРОИЛ - СЕРБИЯ 0:1
Manba: uff.uz
Заказать фильм
html-cсылка на публикацию
