Суперодам бўлиш учун фавқулодда қобилиятга эга бўлиш шарт эмас. Оддий одамлар тиришқоқлиги ва бахтли ҳаётга интилувчанлиги билан бу фикрни деярли ҳар куни исботлаб келишмоқда. Эйми Маллинз (Aimee Mullins) атиги олти ойлигида суякларининг туғма патологияси туфайли икки оёғидан маҳрум бўлди, деб ёзади. Қизалоқнинг оёқларини тиззасидан ампутация қилган шифокорлар у ҳаётида бир қадам ҳам боса олмайди, дея таъкидлашганди. Лекин у бемалол юришни ўрганиб олди, тағин қаерда денг, подиумда – модалар намойишида, бундан ташқари, югуриш ва узунликка сакрашдан ҳам қочмади – Атлантада бўлиб ўтган Паралимпия ўйинларида қатор рекордларга ҳам сазовор бўлди. Бугунги кунда Эйми дунёнинг энг гўзал одамлари сафидан ўрин олган, актриса сифатида кинода, модель сифатида турли нашрлар муқовалари учун суратга тушади.

Икки оёғидан маҳрум бўлган Кулойим (Синдерелла) воқеасини эслатмайдими? Фақат Маллинзда бир жуфтгина биллур туфлича ўрнига нақд ўн икки жуфт оёғи мавжуд. У истаганини кийиб кетаверади. Масалан, югуриш учун углерод толаларидан тайёрланган гепард оёқлари ёки тантана ва анжуманларда қанашиш учун силикон оёқлари – уларни оддий оёқлардан ажратиш амри маҳол. Бундан ташқари Эйми коллекциясида Александр Маккуин намойиши учун махсус қўлда тайёрланган шумтол ўйма оёқлар, шаффоф полиуретандан ишланган «шишали» оёқлар, картошка ва лавлаги илдиз тизимидан оёқлар ва бошқалар бор. Протезлар ёрдамида Эйми ўз бўйини 173 см дан 185 см гача ўстириши ҳеч иш эмас. Вазият шунгача бордики, бир оқшомда унинг паст бўйли дугонаси ундан хафа ҳам бўлиб қолди ва: «Эйми, бу адолатдан эмас!» деб бақирди.

Эйми Маллинз ҳаёти имконияти чекланган одамдан ҳар нарсага қодир одамга қандай айланиш мумкинлигини яққол намоён этади. У гап орасида: «Памела Андерсон танасида менга қараганда кўпроқ протез бўлса керак, лекин уни ҳеч ким ногирон деб атаймайди-ку», деб қўшиб қўяди. Ҳаётнинг зарбига писанд қилмаган Эйми гўзал, соғлос ва омадли инсон бўлди.

Бугун мушук бўлса, эртага ўрмон париси – бу аёлнинг имкониятлари деярли чекланмаган. Унинг жисмоний камчилигини эса ҳеч ким пайқамайди. Маллинз оёқлари шунчаки протез бўлибгина қолмай, ўзига хос арт-объект, аксессуар ва санъатдир. Шу билан бирга унга ўхшаган одамларга тақдим этиладиган улкан умид ва ишонч ҳам. Ахир бир одам уддалаган юмуш бошқанинг қўлидан келмайдими?!

Ҳасадгўйлар уни киборг деб номлашади. Эҳтимол, улар ҳам ҳақдир. Бу аёл танасида механик қисмлар етарли. Лекин улар Эйми Маллинздек инсоннинг руҳан тетик, кучли, гўзал ва меҳрибон аёл бўлишига ҳечам тўсқинлик қилмайди. Бир сўз билан айтганда – суперодам!

html-cсылка на публикацию
BB-cсылка на публикацию
Прямая ссылка на публикацию