Эҳ, севги-муҳаббат ажойиб-да, уни эслашинг билан илҳом қуйилиб келаверади, келаверади, ҳатто шоирликка даъво қилгинг келиб кетади. Дарвоқе, шеърият боғи ҳозирда жа тиқилинч бўлиб қолган. Адашиб кириб қолганлар ортга интилаётган бўлса, ҳаваскорлар олдинга қараб ҳужум қилишмоқда. Натижада кириш йўлакчасида "Ипподром” бозори олдидагига ўхшаш "пробка” юзага келган. Келинг, яхшиси, биз кирмай қўя қолайлик. Бироқ ён дафтаримдаги баъзи бир қораламаларни сиз билан ўртоқлашсам…

Шундай қилиб, танишиб қўяйлик — камина мулла Суннатилло, ғирт бўйдоқман. Ўзбек фильмларининг деярли барчасида бир сюжет бор, эслайсизми? Ота супада кўзойнакни тақиб газета ўқиб ўтиради, ўғил уйқисираб, юз қўлини ювади. Онаси қачон уйланасан, мен ҳам келин кўраманми ўзи, дея йиғлашга тушади. Ота уни юпатган бўлади. Ўғил «майли, уйланаман, бўлди, ойижон, йиғламанг», дейди. Худди шу сюжет бизнинг уйда кечяпти. Шу боис қизлар ҳақида манба йиғяпман. Шундан баъзиларини ҳукмингизга ҳавола этмоқдаман. Бунда худди ўзим билан ўзим гаплашаётганга, мусобақалашаётганга ўхшайман.

— Яқинда бир танишим уйланди. У уйланганидан шундай бахтиёрки, агар хотини рухсат берса яна бир марта уйланишга тайёр, — дедим Мен.

— Жуда кўплаб фанларни биладиган, йигирмадан зиёд тилни сув қилиб ичиб юборган бир олим бошини қашлаб деган экан: «Аёллар нима исташади ўзи?» — деди Ўзим.

— Спиртли ичкимликларга "йўқ” дедим, аммо аблаҳлар мени тинглашмади, деган экан бир майхўр тоғамиз. Бўйдоқларда ҳам гуноҳ йўқ, уларни қизлар йўлдан адаштиради.

— Билиб қўй, уйда соатлар давомида ўз кийимлари билан машғул бўлган аёллар кўчага чиқишганида бошқа аёлларнинг либосларига қараш билан машғул бўлишади, — билағонлик қилди Ўзим.

— Табиатда аёлларнинг гапига гап топиб берадиган биргина табиий нарса бор: акс-садо, — қўлимни ҳавога бигиз қилдим Мен.

— Хотинингизнинг туғилган кунини унутмасликнинг ягона йўли бир марта унутиб қўйишдир, кейин асло унутмайсиз.

— Қизларнинг орқасидан югуришнинг ҳеч қандай ёмон томони йўқ, уларга етиб олиш ёмон, — кулдим Мен.

— Кўчада кетаётгандим, бир қиз билан кўзимиз-кўзимизга тушди ва уни севиб қолдим, қиз қора кўз ойнак тақиб олган эди, — деб хўмрайдим Ўзим.

— Аёллар нимани исташади: севилишни, сўзларини диққат билан эшитишларини, ҳурмат ва муҳаббат кўрсатилишини. Эркаклар нима истайди: вақтида пишган овқат ва футбол учрашувига чипта.

— Бир аёл шундай деган экан: "Ҳеч турмушга чиқмадим. Чунки уйда учта дўстим бор. Эрталаблари ҳурадиган кучугим, тушликда ҳақорат қиладиган тўти ва кечаси уйга кеч келадиган мушугим”.

— Бўйдоқларнинг ҳамёни бор, уйланганларнинг эса хотини.

— Айрим қизлар ўзларини романтикмиз, биз учун ички гўзаллик муҳим деб айтишади, лекин уларга гап отган йигит ғишт башара бўлса, қайрилиб ҳам қарашмайди.

Оғир уҳ тортиб дедим:

— Севишиб қолган ҳозирги йигит ва қизлар телефонда соатлаб шу қадар кўп гаплашишадики, буям етмаганидек бир ойда 5000 та «смс» ҳам ёзишишади. Кўп гаплашишгани боис охирига бориб гап ҳам қолмайди. Мисол учун:

Қиз: — Нима қиляпсиз?

Йигит: — Телефонда гаплашяпман.

Орадан бир соат ўтди.

Йигит: — Сен нима қиляпсан?

Беш дақиқа жимлик.

Қиз: — Мен ҳам гаплашяпман, сочимни ўйнаб…

Хулоса

Бугунча шулар. Юқоридагилардан келиб чиқиб хулоса қиладиган бўлсам яна озгинагина уйланмай турай (бояги йигитга ўхшаб вақтдан ютай). Уйланиш қочиб кетмас. Унинг устига ҳали тайёр қиз ҳам йўқ. Дарахтни тепса қиз ёғилади дейишади, тепмаган дарахтим қолмади, қуриган япроқдан бошқа нарса тушмади. Майли, келаси ҳафтагача бир гап бўлар.