Биринчи апрель норасмий кулги куни эканлиги етти ухлаб тушингизга кирмагандир? Мен ҳам шундай деб ўйловдим. Биз учун ҳар куни кулги куни – бунинг учун алоҳида 1 апрелни кутиб ўтирмаймиз, дерсиз? Бу ҳам ёмон эмас, лекин бошлиқнинг устидан калака қилиш учун алоҳида тайёргарлик кўриш талаб этилади. Буни 1 апрелда қилсангиз, нур устига аъло нур. Ахир 1 апрель кулги куни-ку, бошлиғингиз ҳам буни, албатта, билади. Ҳазилни тушунса, шунчаки кулиб қўя қолади. Бироқ ҳазилни тушунмаса-чи?

1 Машинасини бироз ўзгартириб қўйинг. Масалан, бошқа рангга бўяб қўйсангиз бўлади. Бошлиқ машинасини қўйган жойга келиб қарасаки, «тулпори» йўқ. Унинг ўрнига бошқа машина турибди-да. Аввалига у ҳеч нарсани тушунмай бошини қашлайди. Кейинчалик нима бўлганини англаса, хохолаб кулади-да, елкангизга уриб қўяди. Ахир ажойиб ҳазил эмасми? Ёки давлат рақамини алмаштиринг – ўрнига 007 рақамини (айниқса, байроқ расми билан) бураб қўйсангиз жуда яхши. Тўғри, бу ҳазилдан кўчадаги ДАН ходимлари кўпроқ кулишади. Дарҳол самара беришини хоҳласангиз, томига «мигалка» қўйсангиз кифоя. Ёки эшигига такси белгисини ёпиштиринг. Буни кўрган одам маълум вақт ўзига келолмай овора. Сиз эса вақтдан унумли фойдаланиб, таътилга чиқиш ёки маошни ошириш ҳақидаги буйруққа имзо чектириб олишингиз мумкин.
2 Уяли телефонини алмаштириб қўйинг. Идорангизда бошлиқ тутиб юрган телефонга ўхшаш алоқа воситасидан фойдаланадиган одамлар талайгина. Майда нарсада бўлса-да, бошлиқ билан бир поғонада туришга интилиш одамлар учун хос фазилат. «Нима, бошлиқ тутган телефонни мен ололмайманми?» қабилидаги савол кўпчиликни қийнайди. Кулги куни бу айни муддао. Идорангизда бошлиқнинг адаши (исми бир хил одам) бўлса, айниқса, унинг телефони «каттаникига» ўхшаса, телефонларини алмаштириб қўйиш мумкин. Ана энди томошани кўраверасиз. Бошлиққа ҳамкасбингизнинг улфатлари қўнғироқ қилиб тинчлик бермайди, унга эса, аксинча, то банкдан, то бошқа жиддий жойлардан одамлар уланади. Бу ҳазил анча вақтгача чўзилса ҳайрон бўлманг. Фақат улардан биронтаси бошқа телефондан ўз телефонига қўнғироқ қилиб, ҳақиқатни тушуниб қолганда жаҳл остига тушиб қолмасангиз бўлгани.
3 Ресторан счётини бошлиққа жўнатинг. Идорангизда ишлайдиган (ёки ишламай, ўзини ишлаётган қилиб кўрсатадиган) сиз учун энг нохуш одамни танланг. Сўнгра нархлари қиммат бўлган ресторан официанти билан келишинг. У «жабрланувчи» номига счёт ёзиб бериши ва унда «ваколатли вазифаларни бажаргани учун» деб қўшиб қўйиши керак. Счётда иложи борича аҳмоқона буюртмалар кўрсатилади. Масалан, 40 та қадаҳ вино ёки ароқ ва газак сифатида қовурилган колибри ёки каркидон гўшти. Счётни ички почта орқали бошлиққа жўнатинг ва... қолганини ўзингиз кўрасиз.
4 Тармоқчи маркетинг ходимларини бошлиқ хонасига киритинг. Кўчада катта халтасини кўтариб юрадиган ва «алоҳида сиз учун энг арзон нархларда» мол сотадиган одамларни тармоқли маркетинг ходимлари деб аташади. Тинмай бидирлайвериб, миянгизни қўлингизга олиб беришади. Тепангизда тўхтамай гапиравериб, иложи борича кўпроқ нарсасини тиқиштириб кетиш тараддудида. Тағин «Бозорда бундай арзон нархларда тополмайсиз», дейишгани ортиқча. Ана шунақаларни бошлиқнинг хонасига аста киритиб юборинг. Улар қанчалик ажиб нарсаларни сотишса, шунчалик яхши. Масалан, дазмол сифатида ишлатиш мумкин бўлган чойнакми ёки Луврдаги хоналарни тозалашда қўлланиладиган чангютгич. Хонасида ўтирган бошлиғингиз улардан Луврга қочиб кетишга ҳам тайёр бўлади, ишонинг, бу одамлар бирон нарсани тиқиштиришда устаси фаранг.
5 Бошлиғингизни мақташдан эринманг. Биринчи апрель шундай кунки, унда ҳар қандай гапларни айтавериш мумкин. Шундай экан омма орасида бошлиғингизни бир неча бор мақтаб қўйсангиз, ҳеч ким сизни «бошлиққа пахта қўйишда» айбламайди. Бу бошлиқ устидан энг зўр калака. Биринчидан, ҳамма ҳазил деб кулади, иккинчидан, маошингизни оширишлари ҳам эҳтимолдан холи эмас. Фақат маошни ошириш тўғрисидаги буйруқ ҳам биринчи апрель ҳазили бўлса, кейинчалик хафа бўлиб юрманг. Ҳазиллашишни фақат сизга бермаган-ку, ахир.

Мана бошлиқ билан ҳазиллашиш учун бешта маслаҳат бердик. Уларни амалда қўллаш ёки қўлламаслик сизнинг ишингиз. Фақат баъзи ҳазиллардан кейин бошлиғингиз сиз билан ҳам бир «ҳазиллашгиси» келиб қолса, натижада идорадаги ишингиз узоққа чўзилмаса, биз айбдор эмасмиз. Ҳазилнинг таги зил, деб бежиз айтишмаган.

 

Манба: uzb.orzu.uz