Манави расмдаги Чарльз Дарвин кимлигини биласизми? Албатта, эволюция назариясини ишлаб чиққан буюк биолог. Унинг фикрича, эволюциянинг негизида табиий омон қолиш қобилияти ётади, яъни заиф ва онгсиз жониворлар ўлиб кетади, уларнинг кучли ва ақлли «ака-укалари» эса омон қолади ва авлодларига ўзларининг кучи ва билимини қолдириб кетади. Айнан шу тариқа маймун одамга айланган, деб ҳисоблайди Дарвин.

Хўш, бугунги кунда аҳвол қанақа? Ҳайвонлар орасида вазият жиддий ўзгарганича йўқ: кучлилар заифларни қисиб чиқаришни давом эттиришмоқда. Одамлар эса минглаб йиллар давомида ўсиб, анча ривожланди, тиббиёт ҳам тараққий этди, натижада табиий омон қолиш имконияти анча юксалди. Энди энг заиф ва ақлсиз инсон ҳам бир амаллаб ҳаёт кечириши ва ҳатто фарзандли бўлиши ҳам мумкин. Фақат умуман «томи кетганлар» ёки мантиқ ва онг кўчасидан ўтмаганларгина фарзандли бўлмасидан нариги дунё билан юзлашишади ёхуд болали бўлиш имкониятидан маҳрум бўлишади.

Айнан шунинг учун инсоният генофондини ўз ҳиссасидан халос этганлар (худога шукур), ҳеч ким кутмаган, умуман ақлга бовар қилмайдиган усулда ҳаётдан кўз юмганлар (ёки фарзанд кўриш қобилиятини йўқотганлар) Дарвин мукофотига сазовор бўлишади. Бу мукофотга номзод бўлиш учун «овсар»нинг аҳмоқона ўлими ҳужжатлар билан тасдиқланган бўлиши зарур, деб хабар беради нашр.

Бироқ инсон қўли теккан ҳар нарсада бўлгани каби бу мукофотнинг ҳам ғалати хатолари бўлиб туради. Мисол учун, 1998 йилда овоза бўлган воқеа аслида ҳақиқатдан йироқ бўлиб чиқди: Германиянинг Падерборн шаҳридаги ҳайвонот боғи хизматчиси Фридрих Ризфельдт ич қотиш билан қийналган Стефан филига катта миқдорда ичини келтирадиган дори беради ва ортига ўтиб натижасини кўрмоқчи бўлади. Лекин дори таъсир қилгач, бечора хизматчи оёғида туролмай йиқилади, бошини уриб ўзидан кетади ва фил нажасида нафас етмай бу дунё билан ҳайрлашади. Афсуски, кейинчалик аниқланишича, Падерборн шаҳрида ҳеч қачон ҳайвонот боғи бўлмаган экан.

Энг аҳмоқона ўлимлар бешлиги

Энди мазкур мукофотга сазовор бўлганларнинг беш нафари воқеаси билан танишсак. Ўйлаймизки, бундай ишларга қўл урадиганлар бизнинг орамизда топилмайди. Бешинчи ўринда компьютер саводхонлиги бўйича таълим берадиган 29 ёшли йигит турибди. У иккита бир-бирига умуман мос бўлмаган ишларга қўл урган ва натижада... Америкалик Оскар исмли йигит катта тезликда юришга мўлжалланган 99-катта кўчада Хонда автомобилида кетаётиб, йўл-йўлакай ноутбукда баъзи ишларини қилиб кетишга қарор қилади. Мўъжаз компьютерда нималарнидир ёзиб турганида қарши йўлакка чиқиб кетади ва улкан Хаммерга урилади. Катта машина ичидагиларга жиддий зарар етмаган бўлса-да, ўқитувчи жойида жон таслим қилади. Энг қизиғи, ноутбук ҳам жиддий зарар кўрмаган ва ҳали ҳам белгиланган вазифаларини бажариш билан овора бўлган...

Тўртинчи ўрин Иллинойс штатида яшайдиган икки кишига тегишли. Улар ўз реакцияси ва асабларини текшириш ниятида поезд билан «ким қўрқоқ»қа ўйнашади. Ўйин мазмуни оддий: келаётган поезд олдида ким кўпроқ туриб қолса, ўша ғолиб. Одатдагидек баҳс тунда ўйналди. Икковлон қанчалик қўрқмаслигини намойиш этишни хоҳларди ва мағлуб бўлишни истамасди. Баҳс фалокат билан тугади – ғолиб Патрик Стифф шу ернинг ўзида ер, аниқроғи, рельс тишлади. Поезд эса бамайлихотир йўлида давом этди, чунки машинист баҳс бойлаганларни сезмади ҳам.

«Ғолиб» учликни Виржиния штатида бўлиб ўтган ғайриоддий ўлим воқеаси очиб беради. Январь кунларидан бирида уч ўртоқ чириб ётган омборни бузмоқчи бўлишади. Уста-бузармонлардан бири бензинда ишлайдиган аррани кўрсатиб, бир лаҳзада иморатни гумдон қилишини айтади ва айтганларини амалда кўрсатишга киришади. Лекин тасодиф туфайлими ёки ҳақиқатан берилиб кетиб оқибатини ўйламагани учунми, ишқилиб, иморат томини ушлаб турган ходаларни шартта кесиб ташлайди. Оқибати аён: том ағдарилиб, ишга муккасидан кетган ишчининг устига ағдарилади. Шунга тан бериш керакки, омборни бузишда чаққон ҳақиқий маҳоратини кўрсатишга улгурганди.

Иккинчи ўринни Германияда яшайдиган 63 ёшли кекса эгаллади. У ҳовлисида ўрнашиб олиб, кетишни ҳаёлига ҳам келтирмаётган кўрсичқондан қутулмоқчи бўлади ва қўлидан келган барча чораларни кўради, афсуски, бу натижа бермайди. Ахийри, энг кескин чорага бош уришга аҳд қилади ва бу унинг бошини ейди. Ерга темир таёқлар тиқиб, уларни катта қувватли симларга улаб қўяди ва шу тариқа ерости жониворини асфаласофилинга жўнатмоқчи бўлади. Кекса ҳам аҳмоқ эмасди ва эҳтиёт чораларини кўрган эди, лекин ким билади дейсиз, ҳисобда адашганми, хуллас ўзи турган ерни ҳам ток уради. Киши жасадини Болтиқ денгизи бўйидаги ҳовлисида топишди. Полиция унга етишиш учун бутун уйда токни ўчиришга мажбур бўлди. Терговчиларнинг айтишича, кексанинг ўлим вақтини аниқлаш учун электр компаниясига мурожаат этиш кифоя.

Ниҳоят, биринчи ўрин Жанубий Каролина штатидаги жуфтликка сўзсиз берилди. 21 ёшли ошиқ-маъшуқа ишқини бир-бирига ўзгача тусда кўрсатиш учун уй томига чиқишади. Уй ёнидан ўтиб кетаётган такси ҳайдовчиси йўл ёқасида ётган ёшлар жасадини кўриб қолади. Икковлон оғир жароҳатлар билан яқиндаги шифохонага ётқизилади, лекин ўзларига келмай ҳалок бўлишади. Терговнинг аниқлашича, ёшлар кечаси уй томига чиқишган ва юлдуз тўла гумбаз тагида меҳр изҳор этишмоқчи бўлишган. Афсуски, том жуда қиялигини ҳисобга олишмаган ва натижада сирпаниб кетишган. Мана сизга муҳаббат!

Ҳар қандай ўриндан устун, сўзсиз ғолиб сифатида эса техаслик Майкл Уорнер тан олинди. Ушбу пиёнистанинг томоғи жиддий оғриб қолади ва у севимли ишини – қиттай-қиттай қилишни ҳамма сингари оғиз орқали амалга оширолмай қолади. Аммо муаммо бор жойда ечим ҳам топилади – фақат бошни бироз ишлатиш даркор. Рафиқасининг гапларига қараганда, 58 ёшли майхўр клизма орқали маст бўлиш йўлини топади ва тез-тез шишага, йўғ-э, клизмага мурожаат қила бошлайди. Бир куни пиёниста хотинининг ёрдами билан 3 литр хересни ичига қуяди. Аслида икки литрлардан кейин мастликдан ўзини йўқотиб қўяди, лекин клизма ичимликни ичига қўйишни давом эттираверади. Эртасига Майклни жонсиз топишди. Токсикологларнинг аниқлашича, қонидаги алкоголь миқдори меъёрдан олти баравар юқори экан. Лекин воқеа бу билан тугамайди. Кишининг рафиқаси жиноий эътиборсизликда айланиб, қўлга олинади. Аммо кейинчалик далиллар камлиги туфайли иш ёпилиб кетади.

html-cсылка на публикацию
BB-cсылка на публикацию
Прямая ссылка на публикацию